Dzje zout et nè geluuëve – da is naa àl acht joor lein da òòs Marie-Zjan de duir vàn uire kafei “De Key” in Schurreve-n achter uir taa oude. Dzje kóent uir wol nog zoe àf èn taa zien “ròntsnaate-n” in de geboere wànt se ilt de mànne dèè de bóel uivernàmme reidelek in de mòt. Èn ieërlek is ieërlek : da woor naa nè àltèèt dzjust in de roeës. Ma in passànt ei de kafei be Johnny Iven èn Wouter Vandersmissen achter de-n toug truk oantrèk gekreige. Loot òòs oupe da da naa zoe blif. Óere “Snaat” is doo vàste klàànt èn dee ei ter en góej oeëg in. “Da kum doo in de sakkósj”.
Tieëster e bitsje Gewèède Geschiedenis. Vàn kleinsàf oan lieërde Marie-Zjan de stiel. “As kint vàn tieën joor stònt ich àl pintsjes te tàppe terwèèle da men maa de wàs dui. De minse kàmme-n èè ewa rizzeneire, och ewa stichele èn vàntèèt och àl ens ewa koot klàppe vàn immànt àànders”.
E turke ternoo woore Marie-Zjan èn Alèx e koppel da wèèt èn zèèt bekàànt stònt. Lèk as àlle vroulie woor Marie-Zjan de chèf èn Alèx mòs lùistere, och as ter e koatsje leide be zen kàmmeroade. Ene slóef zoegezeit. Vànaat uire zeetel neeve de stouf iel Angèl Stippelmans de bóel goet int oeëg èn se proffeteirde mie vàn de-n oãbjoãs. Et woor doo braa gezèllig. Da dui mich – de Snaat – trukdeinke-n on den tèèt vàn de joore 60, be bòõ èn bónne tunnes. Ewa koat speile-n on de kuiketòòfel, kòt be de stouf, be de flès witte-n èn braan bier vàn Piedboeuf. On da lèste zin ich ten ààndere naa nog àltèèt versloaft.
Angèl, Marie-Zjan èn Alèx achter de-n tàp
Dzje mòst vàn Marie-Zjan nè tevoul gezieëver verwachte. De klàànte wiste da se allieën mar bier, kokka, spa och per aatzònderieng e gloas wèèn kòste vròòge. Wee et in ze gedacht kreig vàn ene kàffei te vròòge kreig as àntwòòt : “Kàffei ? Ma mènne lieve joeng, doovuir móe-dzjee op de Groeëte Mèrrek zin, in de Venieës och de Rimini”. Marie-Zjan woor àllezeleeve rèchtaat èn se dòs de klàànte-n op unne nummerou zètte-n èn sèè aa och àltèèt en antwèèt gerieët. “Minselief, schei-toch aat be òer gewàffel, doo krèèg ich de-n uuëtzweir vàn” Och wol zei se : “Dzjee geluuëft och nog da de piepels óej eete”. Àllemàn nàmp uir wèè se woor omda de minse wiste da se goet vàn àt woor èn da se àltèèt gerieët stònt ver t’èllepe moe da se kòs. Da woor nog de gòeje-n ààn tèèt dee jòòmer genóeg noeët nemee truk kum.
Àl móe-djze àllewèèle-n oppàsse ver “noeët nemee” te zègge as dzje óech de-n dag vàn vàndaog be De Key loot inrèddele. Dzje zout zègge da dèè oãbjoãs vàn doen stillekesoan truk ònt koume-n is èn de-n deekoar is och nog apeuprè etzèllefde. Twie màn zitte doo achter : Johnny Iven, ene milletèèr dee zen móets on de-n òòk g’ange-n ei èn dee is nè vur ieë koet te vange, èn Rozjei Martens, de bieënour vàn de-n Òòtmèrrek
Roger Martens & Johnny Iven
Intùssentèèt tròek Rozjei richtieng Spanje, Sinterkloos èn de stoeëmboeët achternoo. Da mókt da Johnny Iven en Wouter Vandersmissen naa aat un pèèp mòete koume. Da zin naa wól twie ùiterste. Dzje móet zoe naa èn dàn ewa pasjènse-n ùbbe. Be Johnny is da omda ee gèèn e sigarètsje gie róeke, och da ee ene witte-n op zèn àt gie zitte. Be Wouter is et omda dee màn be twie zoake gelèèk beizig is : dee wèrrekt èn dee dú kafei èn dee is toch och nog mar ene lieërgast. Ma àl be àl zin et twie sjikke tippe, dèè èllèk op un manier probeire de klàànte-n oan te trèkke. Àl móet et gezeit zin : da dzje be De Key et bèste getàpde pintsje vàn ieël de stàt kóent krèège vur 2 euroukes ei doo ieël voul bèè te moake. Zeiker as dzje weit da dzje op àànder plàkke in de stàt 3,20 euro móet doallègge vur en pint, moe da dàn och nog ginne schààm opstie. Och wa túnkt óech vàn ene Teuniesteiner moe da se 4,20 eurou vur tèlle ?? Àllemàn móet de-n dag vàn vàndoag ewa op zen soeze lètte, wor. Vàntèèt zit ich te spikkeleire : Zou de Sjóssei d’Amoeër nè góejekoeëper zin as de Groeëte Mèrrek ? Is doo immànt dee mich da weit te zègge ???
Èn och dee klàànt De key & Johnny kàànt
Afèê, geeft mich mar De Key, geeft mich mar Johnny èn Wouter èn d’oãbjoãs vàn vrugger àl is de binnekàànt ewa gemodernizeirt.
Wa zoe àl ?
– In de plàk vàn de pitsjesbak vàn Marie-Zjan ienk doo naa ene vougelepik.
– Nespressou is in de plak vàn kàffei op de mèrrek gekoume.
– De-n ààn toug vàn 1 meiter is naa 3 meiter lank.
– Et mezik kum na aat de kompjoeter èn nemee aat de radijou.
– Dzje kóent naa baate gezààte sjips èn pàprika och bifi èn zwanwùskes krèège-n, èn zèllef en dzjàt sop.
Loot naa de boere mar dòsse !!
DE SNAATKEVER
