Dzje zèèt altèèt gezien
Òòs stàt stie ter planèèr vòl vàn. En doo koume ter nog bèè. Vrugger woor et alieën Dzjizzeke dee àlles zag. Naa zien Pieë èn Pòòl èn Dzjèf èn Lewieke och àl. As da zoe vóts gie, kóen dzjee nemee on óer kònt krètse of àllemàn ei óech gezien. En toch zèn ich vuir dèè camera’s, uiverèsse da ich zèn.
Et vliegent schèèt
Camera’s in Sintrùin. Doo zèn ter in àlle moote-n èn gewichte. Klein, groeët, lank, vierkèèntig, nuuëmt mar op. Doo zèn ter zèllef dèè op en discoubar trèkke. Lèk dèè on et parrek. Dèè zien àlles, èn, lèk et schint, dèè uuëre-n och àl. Nèmp naa mar da dzjee doo ene frit be zúte majónèès èn en beerepoeët be Andaloeës bestèlt, dàn weite se da boenk on de stàt. Èn as dzjee doo dàn de kakkerèè vàn krèègt, dàn weite s’och verwa da djzee sàànderendàs nè koume wèrreke zèèt.
Stèèf vàn àntroase
Se zien ècht àl. Gót op en àànder, och loot óech ens goet gón : prèès. Knuuëpt óer bróek oupe vur te pisse teige-n ene stróek of en kèrrek, wirremàl prèès. Vroulie móete och nemee àfgestóeft koume da un klieëke vàn de Calèche kum, às se da be de Zeeman gevoenge-n ùbbe. Loot óere-n outou dzjustekes twie menúte stón vur gaa-gaa e bruuëke-n aat t’ oale be Vàngroeëtloeën, och intigge schèllekes sasis vàn be et Bretoentje, garàntie da djzee wier e persès on óer bróek èt. De-n ieële èn de-n àl ùbbe se gezien.
Dzje weit derrèk wee
Ma goet. Às dzjee niks kòntroare doet, móet dzjee fèètelek och ginne schrik ùbbe. Dèè camera’s ùbbe toch och wol en ieël groeëte betieëkenis vur òòs vèèlichèèt. Dzje móet ginne schrik nemee ùbbe da immànt óech en wàffel op óer fassààt gif. Dzje móet nemee zukke no dee wàbbe dee in óer bwat pisde, och no dèè medàm dèè uire ònt (in Zepperen: òòòòònt) op óer zùl loote pisse-n ei. Etsèllefde vur dèè póetwànnese dèè krètse op óer vwatúr getróeke-n ùbbe , och vur dee-n toetùil dee de spiegel vàn óere-n outou fóertgerein ei. Da zèn naa toch serjuis verbeeterienge, wór. Arei, toch às dèè camera’s wèrreke.
Leeftige camera’s
Ma wa doet dzje dàn be de stroote moe da gieën camera’s ange ? Wànt dèè zèn doo och nog zur. Dàn is et wèè in de-n ààn tèèt. Wànt dzje veingt in àlle stroote nog wól en gazèt. Ich ùb et èè uiver zoe immànt dee àlles ziet èn uuërt èn weit, en dee dàn da och nog ròntvertèlt. Zoe immànt dee – lèk Winnetoe – be ze kùpke teige-n óer vinster kum ligge vur in te lètte. Da sórt vinstermikke wèrrekt och gelèk ene camera. Et zèn minselijke camera’s. Int plàt Sintrùins eite se da sórt ‘n Snaat.
