Ma òdertùsse kin ich Mèllevere iet beeter. Èn ieël vuil minse och zoe. Vroog dzje naa in Brussel, Lùik, Àntwèrrepe of Mastricht of se Mèllevere kinne, dàn knikke se àllemòòl joa! De Bõndries, wei dzje wol, aas vàn òntucht, gelèk da se da eite. Ich bèn doo noeët geweest, nimmànt is doo oeët geweest, a dzje iederieën móet geluuëve. Ma ich loot se nè tebèè ràmmele, ich weit wol beeter.
tucht en òntucht
Tenààndere, ieërlek is ieërlek, Joa, ich bèn doo oeët geweest. Ma da was doen de Bõndries nog de Bõndries wàs. Doen wàs da ene-n “dancing”, moe se de kuskusdààs nog spèlde. Naa kóen dzje se loote kusse, terwèèle da se ewa wèèder, be de zùsterkes vàn Sancta Maria, de bèl lùin. Se doen da doo naa wol ònder de noam Asster. Ma nèrreges àànders in Sentrùin lie tucht en òntucht zoe kót bedieën.
Mèllevere naa allieën gón vergelèèke be da etablissemènt, is de minse vàn doo toch ònieër oandoen. Da kèrrekdùrrep ei ieël ewa mieër te bieën. Vrugger àl, doen e pak minse wèrrek voenke in de fabrikke gelèk Fobrux èn den Trudou. Wànt doo is nog altèèt ieël voul te doen. Allieën ùbbe se in Mèllevere et òngelùk da se in twie gesnein wèède dour twie groeëte stieëweige èn ene-n èèzerewèg. Da nimp toch en dieël gezèllechèts wèg. Ma gezèllechèts mok dzje toch aatèèndelek zèllef. Èn be intigge nè te vergeete kafeikes, is in Mèllevere et plezier nè wèèt ewèg. Tenààndere, nèrreges mieër vereinigingen dàn in Mèllevere. Wol ùbbe se dèè doo e doak bouve-n unne kop gegeeve omda s’èrregesàànders wúte wèggejoacht. Ma ver wèèlank nog doo op Terbiest?
Dzjèf Cleeren èn Ludwig Vàndenouve
Mèllevere ei och e pak pòlletikkers miegebrocht, gelèk – as fe òòs bepèrreke tòt de modèrne joore – twie bùrregemieësters: Dzjèf Cleeren èn Ludwig Vàndenouve. Mèllevere is och àllank de culinaire parel – èn nog altèèt – dankzèè On de Kèrrek (òndertùsse gedón) èn de Fakkels.
Be vier kastieële ei et toch ene zeikere “granduir”, da móet gezeit wèède. Den horeca wut gróeder èn blùit doo nog altèèt. De seprosabubbels vàn Eddy Leclèèr wàsse-n oan d’àppelbuuëm. De krèm vàn Lemone is vuil te goet ver sleinks te loote ligge. De Carrefour is òndertùsse ieëlegàns nief gemokt èn ziet-er bezònder schoeën aat. Den Thaikròòm is nè slècht, en moeder Lambik wacht op ene nieve-n aatboater.
vergónne gloure
Toch trúr ich och. Ten ieëste ver PSV Mèllevere. Moe vrugger de zoe góej voetbàlploeg furoure mokde wàst naa kuirreketèrref, of noogelang et sezoen, iet àànders. Ten twidde dour de vergónne gloure vàn Terbiest, de plak moe vuil vàn òòze-n ààderdom e groeët stùk vàn un juicht dougebrocht ùbbe, ma och de plak dèè naa uivergeleivert is ver te vergón. Aprepou, … en púre schààn !!! Èn ten dèrde de Majo, naturlek. Kùste ve deen tèèt nog mar ens opnief beleeve.
Ver op d’ieëste kwèste trug te koume, ich ùp et begreipe. Mèllevere is de-n of vuir de stàt, de vuirtùin!! Wànt doo is ginne-n-inne invàlswèg te voet of be de veilou, zoe schoeën as leings de Godfriedstroot, zoe uiver de beik no et Speilof èn zoe vóts de stàt in. Geniete geblooze!! Minse…proffeteirt tevàn !!!!
