Dùrrep vàn Plezier èn Vertier

Wildere Dùrrep, … dùrrep vàn bier, wèèn, eete èn vertier… Doo ùbbe se bekàn mieër restoroãs èn kaffeis dàn àl d’àànder dùrrepe bedieën. Èn se vuirzien un nogwol vàn un eige noat, wànt énne braar èn énne wèènboer ùbbe se och àl in aas!

Zèg mich naa‘ns, vàn wa kàànte fe Wildere vrugger? Loot òòs ieërlek zén, vàn dèè milletèère wèèk, vàn en àà stoukerèè, joajoa, toen àl, vàn twie voetbàlploege, de Concordia èn de-n Anna, vàn kaffei Palieter èn un oanegezange, vàn de ieëste joore vàn de Wimbeldon, vàn de maneidzje èn zènne gezèllige-n toeëg, vàn de Òòs-Lavrou-Bezukkingkérrek, dèè naa tenààndere nog vuil schóender is as tevuire, vàn de Marcellinous, vrugger ene poeptèmpel èn naa begòt e keingerparadèès,, of meschin nog van dee-n truirwilleg op et krùispunt….

Vàndoag den dag, trúre se nè in Wildere. Dzjust et teigenuivergestèlde. Kom dzje vàn Tràst, dàn kom dzje ieëst ene wèènboer teige. Kom dzje vàn Stoan, dàn móe-dzje ieëst ene braar pàsseire. Doobèè is den toeën gezàtte!  Wildere is e dùrrep vàn vertier.

De-n rèèkdom vàn Wild Wildere op en rèè:

  • Braarèè Wildere be Maaik & Roniek: Wa dèè àllemòòl in un kàsròlle stouke èn gerieëtmoake ei ginne-noam. Mar góet da nè àlles dour dèè ieën schouw wut geblooze gelèk be Fedaar vrugger, wei-dzje nog?? Ieël Wildere zou vandoag den dag 24 oere op 24 in de oeëge wòlleke en high zèn van Kanunnike, Clarisse èn Betty Ford.
  • En Alm’ut begòt, och be Maaik èn Roniek: Tiroul in Wildere. Den ieënige bèrreg is da vàls plàt stùk vànàf Stoan, begod. Ma goet. Ich bèn vàste klàànt. Allieën àl ver de serveuskes. Ich wacht allieën èn nog dzjust tòt dèè un dirndl ààt de kàs oale. Dàn doen ich mèèn leerebróek oan. Da’s belouft!
  • Wèèndomèèn Glwaar de Duràs be Peter: nog inne aat Wildere dee oan den àlkoul zit. Gedón be Jounagolt èn Kõferoãs, of toch bekàn, naa àlles op Sjardonnè, Oosèrwa èn Pienoo Grie. Toch en vroog, Peter: moevuir dèè ligzeetels vuir de duir? Doo lie naa ‘ns noeët immànt in???
  • Tennissènter Wimbeldon be Jurrege èn Katrien. Terwèèle da se terneeve ver e bietsje Oeëstenrèèk zùrrege, zùrrege sèèlies àl joore ver e bietsje Eingelàànt. Minse, getènnist da doo wut, de oeh’s èn de aah’s uu’dzje tòt op Stoan, èn da àllemòòl ver et oeëger belang te diene: den “aprè-tènnis”.
  • En stoase: joa, zoe is’t, in Wildere ùbbe se en stoase. Ma wol ieën moe den trèèn altèèt stil stie èn och moe den tèèt is blèève stilstón. E doeëtloepent spour is’t, dzjust gelèk se da zegge in de gerèchteleke kreinge.
  • Zeive ‘orecazoake: ’t ‘Oeëgààs, 3Sènse, De Stoase, de Wimbeldon, Den Rònne (Kring), Fritùiske Eddy, Krèm ’t Kapèlleke. bóekske vol, pènske gebóste….
  • Nog e pak schóens: zeiker nè te vergeete, dee famuize Chirou Wilduraantjes, de schoul De Zònblóem, èn joa, dèè schoeën kèrrek èn àl da schoeë joenk vòllek op dèè twie nieve wèèke. Èn moug ich de nachtwienkel och nuuëme? Dàn breinge ve de-n ieële stieëwèg nog nè in reekelieng, wànt dàn zoun ve Vànmèchele och nog tebèè móete-n oale, ma loot et òòs mar plezierig ààn …..

Kanttekening: deze editie van de Snaat is gemaakt voor de afkondiging van de nieuwe Coronamaatregelen. De Snaat steunt voluit de horeca-uitbaters die in dit stuk aan bod komen en bij uitbreiding alle horecazaken van onze stad en regio.