- Brustem èn z’n mònnemènte: de Eucheiriuskapèl, et kastieël de Pitteurs, de Tom, de Burrecht, èn joa, De Drèè Gezùsters, et ieënig uivergebleive stàmkaffei in et sèntrum. Joa, joa, e sèntrum ei Brustem och. Da plèènke trik zèllefs op de Grúnmèrrek in de stàt. Ma doo-uiver sèvves mieër.
De Drèè Gezùsters. Dàn ùbbe ve et nè uiver Bertilia, Eutropia en Genoveva, ma wol uiver ieën vrou, Marjèt (Schoeëfs). E mònnemènt in e mònnemènt. Uir ieël leeve ei se doo pinte getàpt, dèk och bedieën b’uir dochters. Naa is se ter nog, ma wèrrekt se nemee. Naa is Zjoãn-Pjèèr Loks, inne dee doo vrugger altèèt vuir, ma naa achter den toeëg stie, de boas. Et interjuir is aat den tèèt, ma ieël oangenoam. Èn et bier is nèrreges beeter. Dzje kóent zèllefs kieze tùsse Stella èn Cristal. De frójjichèts vàn de boas krèèg dzje ter bouvenop. Ieën vàn de biste kaffeis vàn Sintrùin.
In Brustem ùbbe se vuil. Ma se zèn doo och vuil kwèèt.
- De Bunny’s: ich gón doo nè vuil uiver zègge. Et wàs en zoak moe nimmànt kwàm ma moe dzje iederieën kòs ònteige koume.
- De Montini: wee ei doo ne gepóent, gedààst of gevochte teige de Ittaljoanders. Èn dàn woore doo nog de optreedes vàn òòs bekinde Vloaminge. Ich ràppeleir mich nog Tura èn Lotti.
- De vliegplèèn: vrugger stònd e klein en kadukkelèk geleeg èn wút doo gevlouge be serjuis materjoal. Naa stie doo e groeët en sjik geleeg èn wut doo gevlouge be klein vliegtùigkes.
- De voetbàl: ich ùb noeët verstón da dèè vàn Brustem noo Zèppere zèn gegón. Minse vàn Brustem, moe is da ieërgevúl. Brustem verdint ene voetbàlploeg.
Ma Brustem ei och e pak nief kreige
- Vier fritúre: is da nè ewa vuil, minse? Ma goet. De Quatro, Brak Fritúr, Et Dùrrep en èrreges ene fritsjineis tertùsse: de stienweg.
- Den ieënige viswinkel vàn de stàt. Nè allieën vòsse mòssels op de Sjossei Damoeër, in de Winstòn de èchte, in de kàbberdoesjkes d’ àànder, ma och in de Vis&Versa
- Kunstwèrreke: ‘Kings Castle’ vàn Raf Roefflaer èn Miss Liberty aat Njoe Jork … Nèrreges in òòs làànt veing dzje kunstwèrreke be zoevuil aatstròòling.
- Ene mèrrek be zèllefs en spuitende fòntèèn: Joa, spuite kòene se in Brustem och. Doobèè woore se de stàt zèllefs vuir.
