Vùllem ei ècht àlles

Nee, nee, nè Zèppere, ma Vùllem is de vuirstàt vàn Sintrùin. Wànt doo ebbe se àlles. Zònder Vùllem zou Sintrùin zèllefs nè bestón. Dàn zoun vee en woestèèn ebbe. Zieëver in pèkskes vàn de Snaat ? zeiker nè. Wànt al òòs wótter da kum vàn Vùllem. Vàntèèt  ebbe se doo zèllefs te vuil

© Profielfoto De Smis, bewerkt door De Snaat

Dàn lup et spèl t’unne-n aas ònder wótter èn drèève de dóej kieke èn karrepe dour et aas. Ma dzje kóent zègge wa dzje wilt. Doen se doo de kroan taa, dàn is èè àlles no de kloeëte. Dàn móete ve òòs fòntèèn èn oos zwùmbàt vùlle be wótter vàn de Sisindria.

’t Is naturlek nè allieën omda se wótter ebbe, da se och àlles ebbe….. Nee, nee. Vùllem ei ècht àlles, zèllefs mieër as Sintrùin. Ich zit àlles ene kieër op e rèèke.

*De bùrregemieëster: dzje kóent vuir of teige zèn, et e vuirdieël of e noodieël veinge. Joa. Òòze bùrreger of gelèk se vrugger zein òòze majuir, Veerle Heeren wóent in Vùllem èn pèndelt -zoe eit da in et góej Vloams-, èlleke-n dag vàn de vuirstàt no de stàt. Be den outou.

*En góej voetbàlploeg: zis op zis. Doo kóene se in Sintrùin allieën vàn druuëme. Bèn nè zeiker da den ÈsTeiVeiVei  vàndoag den dag teige Vùllem zou winne. As dzje vàn et kloeëte Sèrrekele verliest, dàn kóen dzje vàn iederieën verlieze.

*Et gróeëtste uiverdèkt tèrràs: De Smis ei vòlleges mich et gróeëtste uiverdèkt tèrràs vàn Sintrùin, ten minste as et nè in de kèttele wit gerein dour ene-n traktùir.  De Smis, plei-js toe bie, zoumer èn winter.

*De importèntste dààvemàn: Rafke Herbots is nè allieën pòlletiker èn vuirzitter vàn de voetbàlploeg, ee spèlt och be de dààve èn verkup dààve èn dààvevóejer. Zèllefs in Sjina èn Japàn.

*Ene weereltkampejoen: Och àl is se doo nè geboure èn reist se de-n ieële weerelt rònt, Òòs mitske be èllastikke bieën, òòs  Nina Derwael, is taas in Vùllem. 

*De biste koeruir: Zieëver. Da is Tim Wèllens. Wànt dee wóent in Oalst. Nè woor. Dee wóent doo àllank nemee. Ma Milan Paulus, inne vàn de gróeëtste beloftes vàn òòs làànt, wóent wol in Vùllem.

*Enne Romèènse wèg: Sintrùin ei de Zààtstroot, Vùllem ei en èchte Romèènse boan, “De Romeinse weg”. Dee lup tòt in Kèrrekom èn zoe vòts richting Brustem en Toengere.

*Enne pànoramabasseing: et ei och be wótter te moake, ma vanàf de pànoramabasseing kóen dzje ieël de stàt zien, Loeën, Lieëf, ‘Eers, Àlleke, Gingelom, Lààne, Wùrrem, zèllefs Geink. Ma da liste dùrrep wil ich nè zien.

*Et Veneisieje vàn Àspengouw: gieën einkel dùrrep in Sintrùin wut zoe in twieë verdeilt dour en beik, de Moulebeik. Allieën spèètig da se doo zoe niks bèè doen. Verwa doo nè be buutjes op voare, gelèk in Brugge èn Veneisieje?

*Bloesemterràs as àlles goet gie. In normoal tèède stie in de lènte en bloesemterràs in Vùllem. Proffeteire vàn de zòn in ene ligzeetel, in ’t millàànt vàn òòze natúr, èn prúve vàn al dee góeje bóel  dee òòs streik te bieën ei.

De Snaat