Toine, Jacques, Irène, Kemp en Mariette…. ich mis ze allemool

Kemp, Toine, Jacques, Irène, Mariette…. Do at dje vruger de beste mossele, biefstuk en tomat crevette van Sentruin vuir ene snoepcent. Na moet dje den dekste tèd no ien of aander brasserie of bistro, sjieker, nè beter ma dèk duurder.  Of no de Djat. Ma da leste, da is et bateland.

Mwoe kos dje vruger de beste frit-bisftuk, mossele en tomate-crevette be oos in Sentruin ete? Awal, in het Mosselaas bè de lange Toine op de Nomsestienweg, of bij Jaqcues Moeme op de Hootmerrek, bè taant Irène van de Luxor in de Stoasestroot, bè Kemp op de Groete Merrek of bè Mariette op de Almoolweg. Miscien vergeet ich imand, ma ich oep da et mich dan vergeve wid.
 
’t Is allemool no de kloete. Dei echte frituur-restaurants zen bekan allemool van de koat geveeg. Na moet dje frit-bifstuk, tomate-crevette, of mossele-frit gon ete in een sjiek restaurant, of -as dje be oere teid wilt mie zèn, in een brasserie of bistro. Joa, ve ubbe de djat nog. Ma dee ei ze spel in Dormoal. En dat is vuir ene Truineer et bateland, ne woor djat. Kloeterei hè.
 
Van et bateland gesproake. Den dag van vandoag mot dje al geluk ubbe da do ginne chineis boas is in de frituur. Ich ub et es geteld. Als je van de lichte in Heers no het rond punt on Stayen rèd, dan passeirt dje 6 friture. In drei, de elleft dus, stie ene Chineis achter den toeg. Vrindelek zen ze wal. Wat moet het vool u zijn, mijnheel. Fliet met ene lange hambulgel of een culliewost? Ma ’t Is toch effekes de knop in oer uut umdreien zur, zeiker as dje Tjen Pleivoets of Ilona van et Patatje gewend zet. ’t Zen teide. Ich denk da Fien Mup zich zeiker al vier kir in uit graf ei umgedrèd.
Truk no men favoriete van vruger. No Toine Seis van et mosselaas goenk ich et liefst. Vuiral omda dje do och kos kieze tusse gewoene en eige gemokte mayonaise. Ich goenk specioal vuir dee eige gemokte. Deks van de teid aa ich al twie of drei putjes uitgelek teige da men koem mossele op tofel stond.
No Jacques op de Hootmerrek goenk ich och dek. Alien al om de dikkenak aat te ange. Want dan dochte men vrinde da ich in Melvere zat, oan de kerrek. Ma ich koas altèd voor Moeme. Crème van ene vent, goei ierleke kost en tusse duir een goei mop bouvenop. Dovuir alien.
Be taant Irene van de Luxor a ich een goei contac. Dovuir noemde ic ze och taant. Ma et was gin taant van mich, zura. Be uir goenk ich vuir de goeie frit, ma och vuir de klap. Broaf vrouwke, altèd rechtaat. Mariette en Kemp stonden zeiker bekend vuir un goei woar. Bè Kemp op de Merrek at ich altèd mossele, bè Mariette altèd steek. Vroog mich ne vuirwa. Da was een gewente.
Om af te slate. Toine, Jacques, Kemp, Mariette, Irene…. Ich mis ze allemool. En ich denk da ich ne alien ben. Echte Frituriste wore et, pur sang, dei onze nationale  ier en trots oeg ielde. Brasseries en Bistros moage noch un best doen. Dee kost en sfeer van vruger venk dje do nè. Da de snaat et gezeid ei.