Ve begenne be e roadselke. Ich noem de tien ereburgers van de stad tot na taa be noam, en djilings vertelt mich wee et is…. Ne beschoamd zen als dje et ne altèd weit. Ic ub ter och e poar moete opzuke in mene enceclopedie. Want van fasseboek en instagram en al dé prul ken ich niks. Nie na noel. Den hond zen kl….
Awal, at oechlings geried. Hei zen ze. Tien iereburgers op een rij… Hilde Houben-Bertrand, Jacques Waldeyer, Koen Vanmechelen, André Schotsmans, Albert Soenen, Frank De Winne, Michaël Roskam, Desiré Collen, Kim Duchateau en Pierre-Francois Vranken. Otewal ne provincegouvernuir, ene militair, ene kunsteneer, ene pastoer, ene professer, ene astronaut, ene filmmoaker, nog ene professor, ene schrijver, ene striptiekeneer en ene champagneboer begod. Niks teige de minse zura, inteigendiel. Want et wore of zen stuk vuir stuk ‘kleppers’. Da wal.
Oos iereburgers. Ze moete ene baand ubbe be de stad, iel veul verdienste ubbe gehad vuir oos stad, en oos stad positief no bate ubbe gedroage… Ich ken inne dee dat allemaal hei of hei gedon. Gouden Schoen, Soulier D’Or. Lon. Odilon Polleunis. Be STVV gespeild, bè R Double V DM. Be de roei duvels gewees, het WK in Mexico gespeild, teige de Hollanders gescoord, en goat zoe mar vots. Iel veul betiekent voor et voetbal in oos stad, den oos stad verteigenwodigt op et oegste nivau… Tot do gin probleim. Ma spijtig…. Ee is in Sintruin blève woene. En da moag ne. Want om iereburger te wède moet dje bate Sintruin woene. Aanders gezeid. Oer jas kiere, bevuirbeeld in Brusselt gon woene, of in Kuttekoave, nog beter in Monaco, of nog erger, in Genk.
Minse. Loot oos ierlijk zen. Lon is ne den ienige dee duir da reglement gestraft is. Djillings kent zeiker nog minse aat oos stad dei de titel van iereburger verdiende of verdiene ma em waarschijnlijk noeit zulle kreige. Oan dei minse van be oos rood ich oan…. doet na wat dje wilt, ma verhuist op tèd en gooat vanaf dan oere frit be zoete myonaise en dee hamburger ne be Tjen of ‘t Park ete ma in de Mc Donalds in Genk of de Quick in Hanaat. Alien dan koent dje iereburger wèn, iereburger van oos stad.
En na kump de kat op de koot. Vuir wa, denk djillings, dat ene iereburger ne in oos stad moag woene? Awal, da is aat gevoenge duir ene vrugere burgemiester. Zuk ma es op. En vuir wa? Ve gon et in et goed vloms zegge… ‘Hiermee willen we verhinderen dat er een politiek opbod wordt gedaan en dat er een wildgroei onstaat aan ereburgers.’ Aeners gezeid. Het is aat gevoenge teige et foetele.. Me vuirstel. Loot de minse beslisse. Dan wit do nè gefoeteld.
