Dje zet altèd gezien

camera’s
© Truineer

Dje zet altèd gezien

Camera’s en nog ’s camera’s. Oos stad stie ielemool vol be vaste camera’s. En do koame ter nog bei. Vruger was et alien God dee alles zag. Na ziet Jan en klein Pierke alles. As et zoe vots gie, zien ze oos binnekot scheite op et uiske of kretse as et jukt. En toch ben ich vuir, uiveregs as ich ben.

Et vliegend scheit

Camera’s in Sintruin. Dzje hèt ze in alle sorte en alle mote. Klein, groeët, lang, vierkaant, noem maar op. Do zen ter zelfs dei op een discobar trekke. Zoeals dei oan et park. Dei zien alles en dei hure och alles, no et schent. Stel oech mar es vuir da dje do ene frit bè zoete mayonaise en een berepoot bè Andaloes bestelt, dan weite ze da direk on stad. En as dje dan do van et vliegend scheit kregt, dan weite ze och vuirwa dje ’s anderendogs ne zet koame werrreke.

Stèèf van ontroase

Ze zien echt al. Goat dje vrumd of loot dje oech es goed gon, prijs.   Stoeët dje oer broek af om te pisse teige ene stroek, wirremal prijs. Vroluw hoeve och ne me te stoefe da ze hun kliedje zen gon koepe in de Caleche as ze et be de Zeeman ubbe gehold. Want ze zen gezien. Loot dje oere auto efkes ston om rap een bruudje aat te hoale be Wiame of 100 gram saucisse be  et Bretoentje, proces. Et dje e stuk in oer kloewte, ot dan mar oer at vast. En da is och et geval als dje ine op se bakkes out of iets  op de grond goeit.  Al, ubbe ze gezien, al.  Ziet mar da dje oer oege van achter op oere kop et ston. Want ziet dje un ne, zelles zien oech wal. En dje goat het onder our klitse kreige.  ’t Mokt mich stèèf van ontroase.  Och al doen ich niks verkied, denk ich toch. Arei, ich gon toch och ne men haan in et vur steke.

Dje weit drek wee

Ma goed. Doet dje niks verkied, dan moet dje eigelijk gine schrik ubbe. En dei camera’s zen toch och iel belangrijk vuir oos veiligheid. Want veiligheid boave alles. En zoeals ich al zei. As dje niks verkied doet, koent dje nog altèd fluitend duir de stad. Dje moet gine schrik mee ubbe da imand op oer bakkes toekt, dje moet ne me zuke no de keirel dee in oer brievebus ei gepist of dei madame dee uire hond (in Zepperen: hooooond) op oere durpel hei lote kakke. Dje moet och ne mee zuke no dee gast dee kretse op oer voituur hei getroeke of deman dee de spiegel van oere auto hei afgereie. Da zen toch seriuis verbeteringe. Veul minse zen dan och vuir camera’s,

Leeftige camera’s

Do zen ter zelfs bei dei zo vuir zen da ze op fasseboek reclameire da ze gin carema’s in hun stroot ubbe. Teige dei minse zeg ich, e bietje geduld is op zen plak. Want zoe ’n camerake kost geld. Geld da aateindelijk aat oos tes moet koame. Vuir strote zonder camera is do och nog altèd de aa metoud. Want in elke stroot woent wal een gazet. Ich bedoel, imand dee alles ziet, weit en da och rond vertelt. Imand dee ze kupke teige oer vinster kump legge en dan gelek Winnetoe  no benne let. Och da sort werrrekt gelek ene camera. Et zen minselijke camera’s. In plat Sintruin zegge ze do teige da sort een snaat.